Анна Бутурлина

— Русиеде энъ белли ве бекленильген къадын джаз йырджыларындан бири, аранжировкаджы, Стас Намин театырнынъ санаткяры. Онынъ юзю биринджи оларакъ «Джаз.Ру» меджмуасынынъ джылтында корюнди.

Анна Москвада догъды, башта Гнесин адыны ташыгъан Девлет музыкаль окъув юртынынъ дирижёр — хор болюгини, сонъра исе Гнесин адыны ташыгъан Русие музыка академиясынынъ эстрада-джаз вокалы болюгини битирди. 19 яш чагъында о Русиенинъ энъ гузель оркестрлеринден биринде — Анатолий Кроллнынъ МКС Биг-бэндинде санагъа ильк кере чыкъты, онынъ осьмесининъ келеджек басамагъы — Олег Лундстремнинъ оркестри иле ве русиенинъ энъ гузель джаз иджраджылары иле ишбирлиги олды. Оларнынъ арасында Алексей Кузнецов, Георгий Гаранян, Даниил Крамер, Алекс Ростоцкий, Игорь Бутман ве чокъусы дигерлери. Шимди Анна Бутурлина Игорь Кантюков идаре эткен «Орфей» биг-бэндининъ соло йырджысы сайыла.

Москванынъ белли клубларында ве бутюн мемлекет боюнджа буюк концерт мейданларында эшитиле бильген онынъ соло джаз лейхаларындан гъайры, Анна Сергей Скрипка идаре эткен Русиенинъ кинематография девлет симфоник оркестр иле, Русиенинъ чешит шеэрлеринден биг-бэндлер иле чыкъышта булуна. О эм «Дисней» ширкети иле ишбирлик япа, бестекяр Геннадий Гладковнынъ иджадий лейхаларында иштирак эте ве кинофильмлер ичюн йырларны язып чыкъара.

Анна бутюн мемлекет боюнджа чокъусы халкъара джаз фестиваллеринде иштирак этти — Санкт-Петербургта, Екатеринбургта, Казаньда, Красноярскте, Владикавказда, Новосибирскте, Волгоградта, Ростов-на-Дону шеэринде ве дигерлерде. Эм де «Джаз в саду "Эрмитаж"» ве «Усадьба Джаз» адлы фестиваллерде бир къач керелер иштирак этти ве Lady Summertime 2008 (Кайаани, Финляндия) ве Jazz Voices 2010 (Клайпеда, Литвания) халкъара джаз йырджылары ярышларынынъ лауреаты олды. О соло программаларынен тек Русиеде дегиль де, Акърусиеде, Украинада, Эстонияда ве Финляндияда да чыкъышта булуна. Даниил Крамер, Алексей Кузнецов, Владимир Данилин, Яков Окунь киби белли русиели джаз чалгъыджылары иле чалыша, Олег Лундстрем адыны ташыгъан оркестри иле ве Игорь Бутманнынъ оркестри иле чыкъышта булуна.

2002 сенеси Анна «Дракула» мюзиклинде эки баш роллерден бирини иджра этти, 2009 сенеси «Шахзаде ве бакъа», яни «Принцесса и лягушка» адлы анимацион фильмнинъ рус тилиндеки чешитинде баш рольни (Тиана шахзадени) сеслендирди, 2013 сенесининъ сонъунда исе кениш экранларгъа «Сувукъ юрек», яни «Холодное сердце» анимацион фильми чыкъты, онынъ рус тилиндеки чешитинде Анна Эльза шахзаденинъ ролюни сеслендирди. Бундан гъайры 2011 сененинъ сентябринде Стас Наминнинъ Москва музыка ве драма театринде «Пенелопа, или 2+2» музыкаль-драматик спектаклининъ ильк костерюви тешкиль олунды, бу спектакльде Анна баш рольни иджра эте.

Онынъ эки соло альбомы бар — Black Coffee (2002) ве My Favorite Songs (2006). О эм 2009 сененинъ февраль айында кечирильген биринджи Москва джаз йырджылары ярышынынъ тешкильджиси ола.

2013 сененинъ январь айындан башлап Анна рус тилинде «Джаз акценти: совет кинофильмлернинъ йырлары» янъы озгюн программасы иле чыкъышта булуна, мында Русиенинъ ХХ асыр бестекярларынынъ мешур эсерлери йырджынынъ шахсий джаз оранжировкаларында янъгъырай.

Умумен, Анна Бутурлина русиели джаз санасынынъ ойле векиллеринден бири ки, олар мейнстримде даа чокъ шей айтылмагъаныны ве рус йырджы къызлары америкалы йырджы къызларнен рекъабет эте бильгенлерини мувафакъиет иле исбатлагъанлардан олгъаныны къайд этмек керек.

Koktebel Jazz Party фестивальде о Ваагн Айрапетяннынъ New York — Yerevan джаз квартетнен берабер чыкъаджакъ, онынъ теркибине киреджеклер:
— Ваагн Айрапетян, фортепиано, вокал;
— Кит Балла, урувлы алетлер;
— Зейд Нассер, альт-саксофон;
— Ари Роланд, контрабас.

Фоторесим: Дмитрий Пославский